見工係一場溝女溝仔嘅遊戲

見工係一場溝女溝仔嘅遊戲

見工同識女仔一樣,最初可能都係漁翁撒網,然後睇下邊個願者上吊,再慢慢了解多啲,睇下有無機會發展落去,當然我都唔係啲咁濫嘅人,唔會乜工都啱,會睇清楚工作內容同要求、人工福利同工作地點等而決定發唔發履歷表過去。有時花咗好多心機寫Application letter,發咗好多履歷表都未必有回音,但千其唔好放棄,想搵個好女仔都要比啲耐性嘅,何況搵份好工?

追女仔最興奮係咩?咪就係收到女神電話,話想同你去街街囉,搵工期間,一有未知嘅電話打嚟就會心如鹿撞,因為隨時都係人事部打嚟叫你見工,面試係一個好好嘅機會表現自己,可以話係「不成功,便成仁」,首先梗係要上網做功課啦,了解下女神鍾意啲咩,查佢家宅,即係公司背景,核心價值係咩,做過啲咩推廣活動,有咩競爭對手,最好整埋個短短哋嘅計劃書。

正所謂「人靠衣裝,佛靠金裝」,見工當然要執靚個樣,化個淡妝,遮下個黑眼圈,畫返條眼線,睇落精精神神,衣著呢就最好有啲顏色,因為齋黑白有啲悶,靚不嬲有著數,你話喇,揀另一半有邊個唔係睇樣先?係人都係樣行先再睇內涵㗎啦,其實請人都係一樣。

「使唔使著到咁靚呀你?」男友Mike說。
「大佬我去見工喎,食粥食飯都睇呢舖。」我說。
「而家你又唔係去選美。」Mike說。
「差唔多㗎咋,講真見工都係靠吹水,實力都係要返工先知,所以個印象好緊要。」我說。
「我開始唔想你轉工…」Mike說。

由踏入公司嗰一刻起,你就要溝晒所有人,即使係清潔姐姐,因為你唔會知道公司入面邊個權力最大,我見過真係有間公司嘅清潔姐姐係一人之下,萬人之上,因為佢同大秘書係最老死,得罪佢係會即死。由於所有人都有機會係你第時嘅同事,所以面帶微笑同有禮貌一定無死。

見工就係show time,「台上一分鐘,台下十年功」,要將自己準備嘅嘢show hand,present嘅時候自信得嚟又要謙虛,係難做嘅,而且好多時候都要執生,因為你係永遠都唔會知道interviewer問你咩,至於點先可以做得好?老土啲講句:「Practice make perfect。」我平時就會寫晒所有有可能會被問嘅問題同答案(重點),然後不斷喺屋企自問自答。最後見完工發埋個Thank you電郵,成個溝「女」過程就大功告成。新年後都係轉工潮,我喺度祝大家早日溝女溝仔成功。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *