裸辭定騎牛搵馬好?

裸辭定騎牛搵馬好?

自從上次病完之後,成日都覺得個人好攰,好似瞓極都唔夠咁,可能係之前公司peak season踩得太盡,搞到身心疲累。其實有時都忍唔住問自己,咁辛苦為乜?晨咁早起身迫地鐵,返到公司就變機械人不停摩打手做嘢,去到lunch time先有短短一個鐘可以抖下氣,有時仲要比腦細捉住無咗十五分鐘,工作永遠堆到成座山咁做極都做唔完,準時放工根本無乜可能,唔多加班已經算偷笑,最令人頂唔順嘅係腦細24小時都會whatsapp我,無錯科技係好,但亦都會累死人。

「而家日日都好想辭職,我覺得好攰,好想放長假。」我說。
「Send咗CV出去試水溫先啦,都唔知個市點,搵到先走啦,風險低啲。」死黨阿花說。
「成世人流流長,仲有幾十年工要返,就算我裸辭抖返一個月都唔過份啫?」我說。
「咁我都知你唔返工一個月都唔會餓死,不過搵工都唔係咁易,而且有offer先走就無咁容易心軟,可以大條道理同公司講出面offer好好多,你考慮下先啦。」阿花說。

如果我有一個月空檔,我就可以同父母去飲啖茶食個包,行下山,又或者同阿Mike行下離島拍下拖,慢活一下,甚至去下旅行,好好享受人生,真係諗起都覺得好正。可能你話就算我返住工都可以靠星期六日去享受生活,但我想講往往我都係攰到只想留喺屋企攤屍,有時仲要畀腦細煩住,就算我唔覆佢,都影響咗晒我心情啦。再者,裸辭可以專心搵工,好好準備interview,有工又可以即時返,應該都算係一個優勢掛?

 「你今晚又OT呀?成12點喇喎。」我說。
「改埋個layout先,個客好很煩,腦細又低能,要我哋乜都要就晒個客。」男友Mike說。
「邊有可能凌晨叫人改野!係咪變態㗎!不如你轉工啦。」我說。
「咁又唔好,喺度做都儲到錢,算係多勞多得。」Mike說。
「嗯,好啦咁我都唔阻你做嘢,拜拜。」我說。

想享受生活,或多或少都同錢有關,而想要錢就只可以繼續做奴隸努力返工,除非你係富二代本身已經好有錢,可以錢搵錢買股票滾大佢或者買樓收租,但一般打工仔都無父幹。其實同阿Mike比,我都唔算係好辛苦,所以都係繼續邊搵邊做啦唯有。

 

Photo: Vogue

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *