「下流作者」─ 自創的組合名詞

「下流作者」─ 自創的組合名詞

「下流老人」,可能呢個名詞好多鍾意研究社會嘅人都知道。但我第一次見到係嚟緊 2018-05-16 嘅方東昇一個短節目。

「下流老人」

//…日本近年來出現了大量過著中下階層生活的老人,年金制度即將崩壞、長期照護缺乏人力、高齡醫療缺乏品質、照護條件日益提高、老人居住困難 …//

是日本社會學者 藤田孝典 於其2015年著作《下流老人: 一億総老後崩壊の衝撃》提出。

當中最令我覺得可怕嘅係,引述返方東昇嘅對白,呢一班老人唔係「少壯不努力」,反而仲係啲中產階級,據維基說明有的是年薪400萬日元(120萬台幣)的人,如今就因為負擔昂貴醫療及照顧成本令到自己無晒錢嘅人。

之後我就係到諗,咁到底我宜家要搵幾多錢先夠?

當然,知我嘅人都知道,我唔會係同大家討論,我只會係打爽文或者寫故。用呢個寫作態度去諗,咁即係話我將來都唔會係寫作界上跟到潮流、跟到大隊,所以都唔會得到咩油水。咁我係呢啲時間到搵唔到錢,仲要不斷倒貼去寫作(時間都係成本),係咪真係太唔識計劃自己呢?老咗點算?

其實我真係驚,驚到我明明諗住吃完個飯就繼續做校對,宜家都忍唔住想打幾隻字講下有幾驚。特別係香港呢個地方,未退休之前你都可以自己搵自己食,65歲之後可以點?其實真係燒錢嘅人生,比起我宜家咁燒錢燒得仲誇張,仲要身不由己,比錢買難受。你有錢都話受得無咁辛苦,窮人真係捱住咁受苦架喎。咁我應該點做呢?

放完一堆負能源之後,其實我知道自己想點,我都係會繼續寫故,做自己想做嘅嘢。

無他,如果寫嘢呢個動作,只係為咗比我賺錢、賺人氣、Show off自己嘅才華、建立地位呢啲咁有目的嘅原因,我係會收筆唔寫。寫嘢比我最大嘅得著,始終都係為自己記錄一個存在嘅人生,證明自己曾經係呢個世界到出現過,無論係咪有人認識都好,最少我都有屬於自己嘅作品存在係呢個世界上,我諗如果做到呢一點,其實都已經好滿足。

諗諗下將來到咗65歲,係圖書館無嘢做,搵返自己本《DSE幻想校園》睇下,望下自己嘅青春夢想,咁都幾開心呀!

不過人係好善變,環境一樣,我都希望自己可以KEEP住呢個心態走到老,呢個荒謬嘅世界唔好迫到我最後嘅底線都無埋,咁我嘅人生應該就無咩遺憾。

好!繼續做返我呢個「下流作者」應該要做嘅事,就係校對自己嘅作品!希望《DSE幻想校園》香港書展前可以上架!

 

Photo: 風傳媒

啱睇就Like埋我地個Facebook專頁
這個麻,是一個名為「十三郎寫作團隊」的組織,主要是各種靈魂的混合體,他們有各式各樣的創作,但都以文字為主,所以又稱為「多媒體廢作人」。

Leave a Comment

Your email address will not be published. Required fields are marked *