下次見到呢道門,你會開嗎?

下次見到呢道門,你會開嗎?

朝早見到有傷健人士坐輪椅入呢個洗手間。平時自己開呢道門可以好易,但佢坐係輪椅,就要就開下頂下咁,好困難先入到去。我只係過去幫手禁一禁道門,對佢黎講可能就已經幫左好大忙,令佢可以順利入洗手間。諗諗下,開道門都咁吃力,入到去會點呢?將自己撐上馬桶,再撐番上輪椅。不難想像,可能佢要花俾平常人多幾倍既力量同時間去洗手間。

如果我係佢,其實只要道門係自動門,已經可以方便好多。

自己大學裡面,近幾年來將大部分門,包括洗手間門、任何通門既門都設成自動門,方便傷健人士出入。一開始,自己唔太習慣,因為每次去洗手間都變左要禁制,等幾秒道門開先入得,咁急促既生活,有時幾秒都唔想等,而且想係自動化既世代活用下自已隻手,就索性用手開門。但因為裝左感應器,每道門都比平常重幾倍,好難開,於是就變左造成自己既不便。

但今日見到呢個傷健人士既情境,發現雖然科技進步,自己耐性卻愈少,而且不知不覺間埋沒左對其他人既在意。係同一個社會真係有唔同人,如果唔係互相磨擦,就要更多既包容體諒和同理心。當然希望科技愈來愈進步,有朝一日大學所有裝左感應器既自動門可以好似正常門一樣咁開,但係當好多野未能同時配合到每一個人既時候,最好不過既辦法唔係只訴諸於科技,而係人本身既感受同幫助,可以解決到好多日新月異既科技都未能解決到既事。門太重,等幾秒囉;有傷健人士上地鐵,讓下囉。除左講方便,可以講禮讓。除左以科技衡量社會文明同進步,人與人之間成熟既相處模式會唔會係一個更好既度量衡?

雖然有自動門、升降機、引導徑、交通燈發聲器,但下次有傷健人士坐輪椅入洗手間、仍不忘幫佢開開門,比起自己使盡力開門,會更方便;有視障人士拎住盲公竹,仍不忘扶扶佢行,比起跟地上引導徑行會更快。無障礙設施可以帶來方便;但真正既關注,應該係來自身邊既人。

如果有一日,自己成為傷健人士,我會希望有更多人幫我開呢道門。

 

作者: 望兒

啱睇就Like埋我地個Facebook專頁
歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *