不必客氣,也要知所進退—《大叔的愛》

不必客氣,也要知所進退—《大叔的愛》

以戲論戲,《大叔的愛》唔算得上一流精品,不過以一部深夜小品劇嚟講,就相當清新可喜,詼諧溫馨破格感人兼而有之,短短七集就有條不紊地涵蓋以上元素,仲處處蘊含愛情嘅五味雜陳。

好多劇評都已經講過,《大叔的愛》嘅誇張爆笑BL情節只係吸引你睇嘅花紙,慢慢拆開會發現呢部其實係本格愛情劇,當中描述嘅愛情觀,比好多前設為俊男美女要生要死嘅灑狗血偶像劇,更加立體,更加真實,所以更加容易引起共鳴—無論你係任何性取向都會有嘅共鳴。而引起我共鳴係因為我睇到《大叔的愛》拋出咗一條自古以來困擾萬千痴男怨女嘅不解難題:到底喺一段戀愛關係裡面,應該在乎自己多啲,抑或在乎對方多啲?

直男春田突然被追隨十年嘅男上司黑澤部長,同埋剛相識嘅男後輩牧同時表白,偏偏春田性格拖泥帶水又爛好人,明明知道自己只係鍾意童顏巨乳,但又怕拒絕部長同牧會令二人傷心,更加唔捨得就此失去二人對自己嘅關懷照顧,不來也不去嘅態度令迷戀佢嘅部長同牧更泥足深陷。

兩位追求者嘅求愛取態相映成趣,亦都預示咗呢段「三角戀」嘅結局。部長係猛攻型,毫不掩飾地勇敢示愛,做盡所有懷春少女會為愛人做嘅甜蜜行為,甚至喺春田表態之前已經決絕地同結婚三十年嘅妻子離婚,恨不得時時刻刻將春田捧喺手心上呵護。喺部長眼中,春田完美無瑕,即使現實中嘅春田,懦弱、窩囊、粗心大意、三十歲人仲係渾渾噩噩,得過且過,部長都完全睇唔到。

相反,牧嘅愛就深沉溫暖得多。因為機緣巧合下同春田同居,所以喺愛上春田之前,牧已經好了解春田有咩缺點,而二人嘅日常相處,無論喺表白前抑或表白後,都毫不浪漫,只有兩個全無修飾嘅普通人,平平淡淡地嬉笑打罵,互相陪伴。劇中最令人印象深刻嘅一幕,唔係部長嗰啲sweet到糖尿嘅追求攻勢,而係部長同牧情敵交鋒時嘅一場battle。部長對牧話:我識咗春田十年,暗戀咗佢十年,你識咗佢幾耐呀?你數唔數得出春田十個優點?牧不慌不忙咁回應:咁你又數唔數得出春田嘅十個缺點?

牧明白,愛唔在於完美,而在於了解。佢愛嘅春田唔係自己心目中FF出嚟嘅一個形象,而係一個真實而能夠令佢感到幸福嘅人。

正如偉大嘅《Sex and the City》裡面有提到,一段太過順利舒服嘅關係,有時又會令人覺得too good to be true,患得患失。牧因為清楚自己深愛春田,所以反而害怕同春田嘅同性伴侶關係,無法令春田幸福,於是選擇忍痛分手。佢將春田嘅幸福,睇得比自己嘅幸福還重,問題嚟啦:到底咁又算唔算愛?

如果話部長猛烈嘅愛只為滿足佢不設實際嘅少女憧憬,咁牧一廂情願地為春田作決定,一樣都係自私,兩者都一樣冇了解或尊重過春田嘅真正意願。「談戀愛不必那麼客氣」,牧嘅前男友武川向佢當頭棒喝嘅呢一句,就係咁嘅意思。

兩情相悅,就應該互相畀對方知道自己嘅心意,再一齊決定下一步應該點走。如果下下都單方面用「我係為你好」做理由,而去中止或唔敢開始一段戀情,咁只係掩飾自己懦弱嘅藉口。你點知呢?你覺得自己係對方幸福嘅絆腳石,但可能對方覺得有你佢先幸福呢。兩個人嘅幸福,要靠兩個人努力爭取,悉心經營,誰都不必演自虐女主角或憂鬱浪子嘅角色。

不過,世上又哪有咁多美滿嘅兩情相悅?所以《大叔的愛》又提醒我哋:兩情相悅,就請勇敢把握;一廂情願,就要知所進退。武川得知牧將春田嘅幸福放喺第一位,就立即放棄挽回舊情嘅行動,轉身離去。一個講出「談戀愛不必那麼客氣」嘅霸氣型男,佢嘅離去有別於牧對春田嘅「客氣」,而係出於「此處不留人」嘅一種自知—既然自己喺前男友心中再無位置,就無謂苦纏,係劇中進退得最撇脫嘅角色。

少女心部長亦有成長,由最初將春田奉為聖人,到後來有機會同春田「同居」,認清現實,依然對春田不離不棄,最後大方退出,其優雅深情一如武川,傷痕累累,有苦自知,但從未後悔真心誠意愛過一場。

就連最討人厭嘅春田,最後都終於知道自己想點,主動向佢真正心儀嘅人表明心跡,真係飲得杯落,令劇集有如童話般結尾。現實中,懦弱怕煩如春田嘅人,應該多數只會但求就手,繼續同一個唔知自己愛唔愛但反正已經習慣晒嘅人求求其其過埋下半世,而唔會有膽追返嗰個佢心知無可取代嘅所謂最愛。呢類人,唔係怕結果不似預期,而係怕最後兩頭唔到岸,得返自己一個。好殘酷,偏偏又係人之常情。

知所進退都未夠,劇中仲有一個易被忽略嘅聖人級角色,佢就係部長嘅前妻蝶子。恩愛三十年嘅丈夫突然話要離婚,原因係愛上咗一個男人,明明晴天霹靂,但佢好快就投入成為前夫求愛応援團嘅團員,幫部長擬定策略狂追春田,部長籮籮孿蟻咬咁嗰陣做佢姊妹聽佢傾訴,部長被春田拒絕時佢第一個撲上去心痛大哭。

我諗呢種咁無我嘅愛,未必如外人認為咁虐心,但就需要好深厚嘅感情,先可以將佔有化成祝福。話愛不求佔有係假㗎,可以同有情人成眷屬嘅話,邊個唔想?就係知冇可能,先要搵個令彼此都舒服嘅距離,換個方式互相關心,或埋藏心底暗暗祝福。

Any肥好鍾意呢幾款海報,好痴線又好靚呀。

啱睇就Like埋我地個Facebook專頁
曾經放棄夢想,又突然看到一線希望的寫字女生。

Leave a Comment

Your email address will not be published. Required fields are marked *