叩門現實

叩門現實

籮底橙學校太多,家長派到喊三聲,唯一可以做嘅就係叩門。似樣少少嘅學校閒閒地收兩百份表,我聽過最誇張嘅係地區一線學校收到超過四百份叩門申請,而叩門位只有十個八個。

莫講話四百人,絕大部份學校全級小一連二百人都無,要響兩百甚至四百人當中搶到頭十名位置,你地話難唔難?

對好多學校嚟講,叩門面試就係揀fit馬,有啲學校會索性畀份小一測驗卷小朋友做。根據我完全唔科學嘅調查(即係師奶之間八卦),如果唔係靠人脈或者特異功能(音體藝)叩入熱門官津,通常入到去都係考全級頭二三十。

咁當然,亦都有學校係會睇誠意,或者睇小朋友個派位結果有幾水深火熱。例如本身派到油天然後走去叩喇叭,我諗喇叭都應該會直接無視嗰份申請咁囉。

雖然講到競爭好激烈咁,不過都係嗰句,要對自己眼光同小朋友能力有信心。叩門係音樂椅遊戲,未到最後一刻都唔知會點。識得有同學仔係派A校,叩BC校,B校即畀offer,等到成七月尾,心諗塵埃落定要去B校買書簿校服上適應班(但其實比較中意C校),點知C校就打電話嚟叫家長去註冊,全家喜出望外到要開香檳咁滯。

聽過有個笑話:情人結婚了,新郎不是我。損友話:「娶唔到,唔使愁!婚,結完會離,兄弟你重有機會!」讀書都一樣:「叩唔到,唔使愁!學,入完會退,媽媽你重有機會!」

叩門叩唔到,重有樣野叫插班,一年班插唔到,可以等二年班、三年班,總會有人因為搬屋移民而中途退學嘛,最怕係你唔夠誠意同決心。例如街坊個仔響爆谷普教中學校讀到牙痛咁聲,想轉校插班,我通曬水話佢知我家大B有同學退學,可以試下嚟一招人棄我取。不過最後家長覺得一動不如一靜,由得個仔繼續捱,咁我呢個旁人都係白肉緊一場。

 

山地媽

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *