擾敵

擾敵

機心港女榮升人母就變成機心港媽,兩年前開始流傳陳守仁面試要拼讀amphibian、reptile等,早排陳記校長出嚟否認。咁校長無理由講大話,咁咪即係機心港媽奸招擾敵。

直私面試有得擾敵,官津叩門、官津小一一樣有得擾敵。

K2老母已經周圍曬命話小朋友補齊Jolly Cambridge Trinity裝備將來叩門,重識得默幾十個生字,但事實上又有幾多間官津被叩門要睇呢樣?

K3老母早幾日去做小一新生註冊,我接放學時唔使偷聽都聽到佢地大大聲高談闊論自己仔女讀國際幼稚園英文普通話點叻然後又綠茶婊tone話擔心升咗小一聽唔明老師講書(下刪一千字),嚇到啲無外補嘅老母面都青埋。

頂你個肺你送個仔讀廣東話唔多句嘅幼稚園咁揀間粵教中小學嚟托呀?直行轉左有普教官津,直行轉右有直私國際。

啲老母鍊住把死人聲曬仔女英文,無非都係(自覺地/不自覺地)擾敵。不過我想話,其他學校我唔知,呢間學校小一第一次英文默書係letters A to Z咋。

做老母真係少啲定力都唔得,BK WhatsApp group睇得多就好易羊群心理被催眠帶仔女補呢樣嗰樣。我嘅經驗係,報直私國際係點我唔知,但咁樣裝備入到官津係over-prepared兼悶死個仔。

媽媽們,記得揸住宗旨做人呀!

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *