快到跟唔到就好?

快到跟唔到就好?

老母群組有人share K2仔要做小一程度中文擴張句子功課推到上報。然後山地媽又私下聽到有老母送仔女外補數學,K2學到兩位加減(小二程度)、K3學分數(起碼小三程度,因為大B學校都未教)。

人地個仔係數學神童,我唔會阻人發達。不過,人人都想個仔係神童,就真係個個都係神童咩?

正如蔬菜水果要不時不食至好食,用九牛二虎之力教個K2仔一啲到小一二自自然然輕輕鬆鬆學得識嘅野,你地話係咪好徒勞?

大B小一個數學老師嚴嚴地惡惡地但教學好有辦法而且錫學生,我到而家都記得佢響入學前家長講座話過:「由而家到開學嘅時間,爸爸媽媽響屋企多啲陪小朋友玩手指啦,練下3+3、8-2之類10以內嘅加減,咁就夠應付開學架喇。」

而家K3外補已經學到分數,即係已經學曬加減乘除,隨時暑假會學埋百分數、幾何、圓周率,咁上到小學準備悶足三五年數學堂啦下。

我知道家長咁樣裝備小朋友係為考直私或報官津可能有叩門之需,不過我覺得太over囉。入心儀學校係想小朋友學到野、讀得開心,但係為咗確保考到入直私、抽唔到都叩到入心儀官津,而先折磨個仔兩三年學呢樣嗰樣,係咪本末倒置咗呢?

咁當然有人會話咁樣唔係折磨、個仔學得好開心。咁個仔開唔開心就唔使同人解釋嘅,個老母唔好自己呃自己就得喇。

 

facebook

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *