Breaking Bad 十周年

Breaking Bad 十周年

轆轆吓fb先知,原來離Breaking Bad首播都已十年。由我十幾歲開始睇過嘅美劇唔算好多,亦唔算少,即使我深愛Game of Thrones同Mad Men,Breaking Bad依然係我心目中最好睇嘅美劇,絕對沒有之一。

如果你從來不識Breaking Bad有何吸引,齋睇個cast嘅外型,你應該呢世都唔會提得起勁去睇呢套長達五季共62集嘅連續劇:演員(對香港觀眾嚟講)冇個識,個個都係其貌不揚嘅叔叔嬸嬸,最年輕嗰個角色仲係一名真實嘅腦麻痹症患者……咁嘅牌面,點解可以喺IMDB獲觀眾9.5分超高評價,同Game of Thrones並駕齊驅(Game of Thrones有排未完,其實都不能蓋棺定論),而且喺劇集完結五年後嘅今日,仍然教萬千fans未能平伏(冇錯,唔只未能忘懷,係連最後既震撼又失落嘅複雜情緒都平伏唔到)?

因為個劇本實在寫得超班地好。人到中年嘅Walter White,係個中學化學教師,屋企有個賢內助,一個剛出世冇耐嘅B女,比較特殊嘅係大仔,係個行動不便嘅小兒麻痹症患者,除此之外家境平凡得很,中產生活還算過得去。突然,Mr. White被確診患上末期肺癌,佢身為家中經濟支柱,死不足懼,但妻兒日後嘅生活令佢於心難安。某日,佢喺街頭重遇以前一個頑劣但對佢仲有幾分尊敬嘅學生Jesse,發現對方已經係一個毒品小拆家,於是靈光一閃,諗到一個搵快錢嘅方法……

原來Mr. White表面上係個普通化學教師,實際上佢係一個失意嘅優秀科學家,因為早年某啲個人原因,無法喺科研路上更進一步,只能鬱鬱不得志地教書維生。偶遇Jesse後,Mr. White諗到可以靠自己嘅專業知識,親手製造純度極高嘅冰毒,再聘請Jesse幫佢散貨,謀取暴利。由於Mr. White貨真價實,佢嘅「手作」果然大受歡迎,而佢獨門秘製嘅「藍色冰毒」(blue meth),唔只成為佢嘅標記,亦引起黑白兩道注意,開始對佢步步進迫……

如果要你續寫呢個故事,我諗十個著咗九個人會主力著墨黑白大惡鬥,只要鬥智鬥力場面夠睇頭,穩打穩紮拍部最少值7.5分嘅警匪劇其實唔難,但Breaking Bad不止於此。除咗觀眾期待嘅場面不缺(還比預期更緊張刺激,有幾個經典場面甚至睇到人嘩出聲),Breaking Bad最厲害亦最好睇嘅係佢對人性嘅刻劃非常細緻,隨住劇情發展,幾乎每個主要角色都有180度嘅轉變,正如製作人Vince Gilligan所講,咁喺電視史上可謂前所未見,但由於每個角色都鋪陳得好仔細,所以再極端嘅轉變都毫不突兀,仲非常貼合人性同埋角色本身嘅性格,真正做到「意料之外,情理之中」。

個人而言,我係一路睇一路讚嘆每個角色嘅設定點解可以咁獨特,獨特到幾乎從來冇喺同類影視作品裡面睇過類似嘅人物設定,所以無論角色好壞,都有佢難以言喻嘅魅力,令你好投入想知道會有咩事喺佢哋身上發生,而呢種獨特性唔代表離地,相反因為編劇好擅長捉住人性嘅共通點去發揮,即使你明知道喺現實中冇可能會有劇中人嘅經歷,依然能夠理解佢哋嘅思維或情緒。

例如劇中掌控墨西哥毒品供應網絡嘅大毒梟Gus,一般荷里活設定可能會將佢美化成Johnny Depp咁嘅外型,然後有一段為世所迫掙扎求存嘅過去,最後成為盜亦有道嘅大毒梟~ 或至少好似另一部好評美劇Narcos咁,個主角一睇就知唔慌好人,但Gus嘅設定係一個外貌和善穩重,經營連鎖炸雞店嘅正當商人,平時仲會親身落舖賣炸雞,兼捐錢畀社區做禁毒工作!而化名Heisenberg製毒販毒嘅Mr. White,亦慢慢由有啲怕事、只為兩餐嘅平凡中產,逐漸變成狂妄自大、心狠手辣嘅毒梟,各個角色嘅反差同轉變非常精彩,甚至有點滑稽,但又合情合理。

亦由於每個角色都有血有肉,所以角色之間嘅互動同衝突就好有張力,仲一季比一季好睇,睇到人好肉緊。好似到最後Mr. White同Jesse之間亦師亦友,既是知己又係敵人,但更似父子嘅複雜情誼,就令人邊睇邊揪心,呢種難以形容嘅觀影感受又係從來未有過架,因為根本冇一部影視作品寫過一段咁奇特又咁能夠令觀眾代入嘅關係。

當然,多得各個演員嘅精湛演技先可以將個咁正嘅劇本演譯得咁好,而我相信一個正嘅劇本自然就可以幫到一班專業演員投入角色,兩者相輔相成。飾演主角Walter White嘅Bryan Cranston,將一個好好先生,逐步演到變成一個眾叛親離嘅末路梟雄,當中嘅內心角力,等於一套劇演咗人哋幾套嘅角色總和,難度極高,但佢演得絲絲入扣,真係會令你對佢又愛又恨。Bryan Cranston亦憑Breaking Bad由原本因長壽處境劇Malcolm in the Middle(明珠台譯《左右做人難》)被定型嘅二三線喜劇演員,一躍成為一線演技派,終於被觀眾發現佢更多方面嘅演藝才華,我諗對於演員嚟講,最欣慰莫過於此。

最後不得不提Breaking Bad仲有一個意想不到嘅貢獻。同期有兩部美劇都以科學為題材,一部係Breaking Bad,另一部係The Big Bang Theory,兩者都打破咗科學被人認為都係沉悶離身嘅印象,當中靈活穿插嘅科學知識,都有根有據,可以喺日常生活上應用,令科學白痴如我,都睇到嘖嘖稱奇,咁大個人第一次覺得「呀原來科學係咁有趣咁博大精深架~」,所以呢,一部資料搜集充足嘅影視作品,唔只可以令部戲更紮實,仲可以有教育觀眾嘅作用添,前提係:創作人唔好當觀眾白痴囉。

P.S. 呢輯相影得極靚,來自Entertainment Weekly Breaking Bad Reunion十周年特輯:http://ew.com/tv/breaking-bad-cast-reunion-photos

啱睇就Like埋我地個Facebook專頁
曾經放棄夢想,又突然看到一線希望的寫字女生。

Leave a Comment

Your email address will not be published. Required fields are marked *