人生,一場旅程

人生,一場旅程

小學個陣問老師,人生嘅意義係乜(你無睇錯,係小學)

班主任是但敷衍咗我,直到一位美術老師同我講解釋:人生一場個受苦嘅過程。

讀藝術嘅人就係唔同啲,講嘢諗嘢都係比較天馬行空,九唔搭八,亦導致呢種性格係我體內萌生。

人生本來就係黎受苦,生老病死,愛恨別離,求不得。

苦味,永遠都係陪隨左右。因為我地都係凡人,平凡嘅人就係受呢種苦,你想超脫呢種層面就要放棄慾望。唔得?你就要繼續受苦。

苦味,係與生俱來;擺脫唔到,就要學習同佢一齊存在。因此要了解苦味,就要了解苦味來源。

而苦味好多時就係來自於我地對期盼嘅事情有所出入。

愛得不到,恨離不了。

正如之前所講,苦味係擺脫唔到嘅事,唯有學習共存。苦味就係來自一種期盼嘅反差,因為適度嘅負面幻想係比任何正面思想更正面。

任何可能都會發生。可能,我地會突然死,突然大爆炸,突然有人離開,突然你愛嘅人離開你。

正正就係活在當下嘅重要性,因為過去是歷史,未來是謎,今日就是一份禮物(Yesterday is history , Tomorrow is a mystery , today is a Gift. That’s why they call it the Present)

好好對待今日,就係最好方法就面對自己人生。

苦,我地唔應該忘記,而係要好好面對佢。

我有選擇過去做盡一切去忘記痛苦嘅回憶,但回想一刻就何嘗唔係痛心疾首。

「接受佢啦。」

接受一你嘅人生包括呢樣嘢,你選擇去忘記只係一種逃避,好好面對自己痛苦先係對自己最好嘅方法。

接受呢一切,包括痛苦。

人生唔係食自助餐,好多時無得你揀哂自己鍾意食嘅嘢。

唔好食,其實你都要硬食,食多啲,食慣咗。

將來個份甜品,就係更加美味。

人生痛苦嘅事其實未必咁多,可能只係得一兩成,但硬要記住不斷重覆洗自己腦,話比自己聽係一個悲劇主角,你就永遠都係一個悲劇主角。

分別係,電影入面主角都會有人可憐,生活中你只係一個無人在乎嘅卡喱啡。

要做,就做一個導演或者作家。

剪輯一下痛苦同快樂嘅鏡頭,到你人生終站時候,起碼你會覺得一場精彩嘅故事。

起起落落,總會包括痛苦同幸福。

啱睇就Like埋我地個Facebook專頁
港豬廢青一名 只想吃喝玩樂不勞而獲 不求踏實地但求公屋有期

Leave a Comment

Your email address will not be published. Required fields are marked *