做傳銷其實同入邪教無乜分別

做傳銷其實同入邪教無乜分別

「想唔想快啲有錢結婚買樓?」
「想唔想快啲搵到人生嘅第一桶金?」
「想唔想出人頭地?」
「想唔想一世免費用護膚產品?」

曾幾何時我都試過比朋友說過我做傳銷,不外乎都係講埋晒啲咩錢好易搵呀,可以不勞而獲呀,好快發達呀等等,當時我都聽過唔少層壓式傳銷嘅恐怖嘢,咩比人呃咗幾多十萬,有幾個大隻佬圍你要你簽約,所以對傳銷印象一直好差,而且用咁嘅方式去搵錢真係唔係幾好,所以我都無乜點理佢,之後亦無再聯絡。

以為可以告一段落,但原來做傳銷嘅人真係無處不在,最近我又發現原來有同事做緊傳銷,然後佢又說我一齊做,可能我個樣真係好易呃掛。今次有少少唔同,佢先同我講佢嘅產品有幾好,例如話某某護膚品好好用,用完皮膚水潤有光澤,某某酵素可以健康減重,親自試過好有效,所以想我同分享,絕對唔係sell我,唔買都得,聽咗先囉了解下咋嘛。

傳銷嘅人都有啲共通點,首先就係會叫你千其千其唔好其他人講,梗係啦你一同人講,人哋就會識破佢嘅詭計,叫你唔好理佢,話佢只係想呃你錢。你諗下,如果真係咁筍,點解唔搵多啲同事一齊開心share先?第二就係不斷用錢/你想要嘅嘢嚟引誘你,有伴侶就講結婚買樓,單身嘅就講搵快錢、發圍。所以話人一有貪念就好危險,唔該大家聽到呢啲筍嘢嘅時候首先問下自己:「邊有咁大隻蛤乸隨街跳?」然後就話比信任嘅人聽。

第三就係佢哋好似撞邪咁款,平時明明好正常,一講到傳銷就會著咗魔咁,講到好興奮,雄心壯志,又話有人唔知幾耐就買到法拉利、豪宅,仲要似係真心信嗰隻,又或者佢自己麻醉咗自己啦。如果你諗住佢撞邪啫,唔關你事,咁少年你真係太年輕喇,因為第四係佢哋永遠唔會放棄sell你,就算你拒絕100次,有晒唔同理由,佢都仍然會不停同你講有啲咩好處,試咗先啦,聽咗先無壞,煩到你應承一齊做傳銷/買佢嘅產品為止,好多人嫌煩就中計。

仲要呢啲通常唔止佢一個人做,佢嘅姨媽姑姐三叔公都會一齊做,然後個個星期出嚟聽分享會,當搞生意,話自己做緊產品代理,又改埋晒啲名分職級,咩伯爵、侯爵、公爵、尊爵,真係好得人驚。你而家理睇緊呢篇文嘅時候,一定會覺得中招嘅人好傻,但係千其唔好以為自己好醒一定唔會奶嘢,因為我都有一刻猶豫過不如聽咗先,就係佢講到:「你都想同男友結婚買樓啦,但係你而家打呢份工係無可能㗎喇,就算你好勤力又點?到頭來咪又係得個吉。」真係講中咗我心入面嗰句,咁點解我又無中招呢?因為我即刻同男友講,佢話:「好明顯呢種人就係自己貪心,比人呃咗入局,而家要拉多幾條水魚陪自己去止蝕,或者賺錢,你唔好理佢。」

如果係朋友,我可以同佢斷絕來往,但係同事就難搞啲,日日對住,唔通我辭職避佢咩,唯有一直話唔得閒拖住先。我唔排除佢嘅產品可能真係好用,亦都唔排除做傳銷真係可以賺大錢,只可以話呢種style真係唔啱我,亦想提提大家要小心啲,因為似乎傳銷又再捲土重來了…

Image : sbs.com.au
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *