我只想身體健康

我只想身體健康

今個月我破咗自己嘅個人紀錄,就係一個月內睇四次醫生兼請咗幾日病假.睇開我啲文嘅讀者都知我公司係無病假,所以平時唔係病到得返半條人命我都唔會請假,可想而之今鋪係幾嚴重。至於一個廿幾歲(好彩未到三字頭)嘅人點解都可以身子咁弱?我都唔識答你,其實以前我真係好少病,就算病都係兩日就好返,可能真係年紀大咗,工作又忙咗,壓力又大咗掛。

胃痛咗兩個星期,以為自己有咩隱性病,又唔夠膽照胃鏡,鬼咩我份人又怕死,同時又覺得仲有好多嘢未做,唔想死住,好彩睇咗專科食咗一個星期藥暫時都無事,但醫生話胃痛唔可以食嘢食咁快,唔可以食濃味嘢,唔可以食過咸過甜,唔可以食太飽,簡單啲講即刻清淡為主,遠離食好西。

點知搞掂個胃痛無幾耐又感冒,喉嚨痛、發燒、咳、流鼻水、鼻水倒流等等,係人都病過,唔使我講都知有幾辛苦,真係食龍肉都無味,我每日淨係食甜餐包,白方包同魚蛋粉。加上感冒係唔可以食煎炸嘢,基本上又係以清淡為主,真係好無癮。最慘係鼻水倒流喉嚨勁痛瞓唔到,我試過要坐喺度瞓。
每次有人生日我第一句都會祝佢「身體健康」,雖然好老土,但係我覺得身體健康真係最重要,就算你好似李嘉誠咁有錢,但病到死下死下咁,啲錢又有咩用?頂多都係用嚟比醫藥費,可以瞓間好少少嘅私家醫院。好喇就算比你飛到去日本食高級懷石料理,但係你病咗鼻塞兼口啖啖,就算美食當前,一樣係無用。

朋友約唱K,happy hour 直落玩通宵都無心情去,因為已經聲都變埋,甚至失聲,想叫想笑都唔得。除咗自己辛苦之外,仲會令到另一半同屋企人擔心,阿爸阿媽成日都唉聲嘆氣,擔心我唔知有咩事,搞到我都唔係幾敢咳出聲,淨係留喺房昏睡。小病都咁辛苦,何況係大病?所以大家真係要好好保重身體,以下提供保健五步曲,就算做齊都未必一定身體健康唔會病,但點都有啲用嘅(我估XD)。

1. 早睡早起(聽聞最理想係10-11點就瞓,仲可以減肥添)
2. 多食蔬菜水果(橙同奇異果有維他命C)
3. 每星期做帶氧運動(跳舞、跑步都OK)
4. 保持心境開朗同放鬆(至少唔會胃痛)
5. 注意個人清潔衛生(去完廁所洗手後要拎紙巾推門;手摸過公眾地方唔好掂口鼻;用酒精洗手;人多地方戴口罩等)

次次一病我都會諗起張偉健嗰首「我只想身體健康」

我只想身體健康
我害怕你要照顧我擔心得出一臉倦容
而我病床中反悔內疚
令你太心痛

我只想 身體健康
要活到過百歲不需拐杖都可跟你相擁
不忍你勞碌的照料我
受了這種切膚之痛

 

Photo: internet

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *