親力親為嘅腦細真係幾charm

親力親為嘅腦細真係幾charm

話說有日朝早我要去某個地方度跟拍攝,個地點都幾偏僻,所以我一早已經google定點去,首先要搭地鐵去旺角,再行一段路,轉巴士,又再行一段路,我怕遲到所以都預早好多出門口,正當我大汗耷細汗咁喺度搵緊路嘅時候,腦細阿Rex就打嚟。

「位置?我今朝都要過去,車埋你。」Rex說。
「岩岩搭完地鐵去旺角,喺新之城附近搵緊架巴士。」我說。
「咁你企定定喺新之城等我,好快過嚟。」Rex說。

對於我呢隻迷途小羔羊嚟講,呢個舉動簡直係令我感動流淚,你知啦呢幾日真係熱到hihi,我行咗一陣已經出晒汗,當然啦如果佢一早話接我會更好。等咗一陣佢就到,一上車,除咗有勁舒服嘅冷氣涼之外,Rex仲遞咗枝凍水畀我,話驚我中暑,啱啱落車買應該仲凍,其實應該係小的去服侍腦細,而家調返轉頭真係有啲唔好意思。

去到拍野場地,我哋就各自各工作,基本上Rex同其他同事已經打成一片,我仲見到佢竟然幫手搬貨,啲同事又乘機叫佢整呢樣整嗰樣,雪櫃都叫佢整埋,搞到件恤衫都污糟埋。雖然佢好親民,但係佢不嬲都獎罰分明,如果做錯嘢一樣係會比佢剷上天花板,不過好在佢唔記仇,第二日佢就會當無事發生過,總之你之後好好做嘢就得。

跟完拍攝已經好晏,所以一齊食個lunch先返公司,去咗間平民西餐廳度食,平民到連紙巾都無張,所以我就喺個袋度搵,點知佢已經比我快一步拎咗出嚟比埋我用,大佬真係細心過我。其實都唔係第一次坐佢車,但係每次坐佢車返公司都會招嚟奇異目光,都預咗啲人會喺背後作故仔。

Rex一直都係公司嘅鑽石王老五,有唔少同事都希望有朝一日可以飛上枝頭變鳳凰,所以久唔久都會有同事姣佢,至於點姣,可以睇返我篇舊文《喂,唔係個個女人靠姣就上到位㗎!》而我同其他同事當然係一齊食花生啦。

作為腦細,我係尊敬佢,亦覺得佢做嘢嘅時候好charm,因為佢真係好叻,咩事都解決到,唔係淨係識得用錢去解決問題嘅富二代,而係貼地到落手落腳一齊同你拆彈嗰種,所以跟佢做嘢會好安心。但作為男人咁睇,當然又係另一回事啦,所以我一早已經喺公司講咗我有男友,清清楚楚,費事惹麻煩,亦希望另一半安心,而且大部分同事都見過阿Mike,不過而家寫咗篇文讚另一個男人,今晚唔知要唔要返去跪玻璃了。
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *