遇到仆街唔可怕,最怕係唔肯起返身啫

遇到仆街唔可怕,最怕係唔肯起返身啫

好耐無去姊妹屋企,最深刻當然係以前失戀去佢度過夜,嗰陣真係喊到眼都腫埋,慘慘豬。幾年後,我再上去已經係講緊大家拍拖嘅幸福事。成日都畀人話我放閃,但其實幸福真係得來不易。仆街,係人都遇過,包括我。成日都聽到一句好老土嘅說話——「戲如人生」,但有時現實總比戲劇更誇張,我仲記得嗰日我去完Poly面試,就即刻打畀當時嘅男友X先生,諗住同佢講頭先面試嘅事,點知無人聽,唔緊要啦咁我打畀好姊妹講下先!

「喂,我interview完喇!OK啦都算叫做同個professor有講有笑!」我輕鬆地說。
「咁咪好囉!喂?喂喂?做咩唔出聲呀?」好姊妹阿花說。
「我見到我男友拖住另一個女仔行過。」我冷靜地說。
「下,你講笑咋下嘛?唔好玩啦,係咪睇錯?」阿花說。
「唔係,我真係見到,個女仔仲對住我笑。」我說

後來X先生竟然仲夠膽死whatsapp搵我,問我可唔可以搵日坐低傾傾,我話同佢已經無嘢好傾,但係佢仍然用whatsapp同電話轟炸我,又話喺我屋企樓下等,所以最後我都同佢去咗間cafe度講數。成個傾計嘅過程我都好冷靜,半滴眼淚都無留過,連眼紅紅都無,相反,佢就喊到眼淚鼻涕係咁流,嗰次係我第一次見佢喊。

「你喊乜?我先係最應該喊嗰個。」我說。

其實我真係唔明點解出軌嘅人可以喊得出,「浪子回頭金不換」呢句嘢我從來都唔信,「一次不忠,百次不用」我就信喇,不過我始終都係個小女人,同佢行咗出cafe,大家各行各路之後我就忍唔住喊咗出嚟,之後幾年我無時無刻都可以喊,一早起身啦、等車返工啦、搭地鐵啦、臨瞓前啦,喊到成個人抽乾晒,又專聽埋晒啲慘歌,沉淪咗一段好長嘅時間,好彩有姊妹支持同陪伴,隔咗好一段時間先可以完全放低佢,重新做人。

雖然受過傷,但係我而家一樣好哋哋,無穿無爛,仲成日喺度放閃搞到比人鬧。而家睇返轉頭,其實好彩佢咁衰,我先有機會遇到大家都好熟悉嘅阿Mike,所以其實遇到仆街真係唔可怕,最怕係自己唔肯起返身啫,如果你仲係沉淪緊,唔使擔心,因為時間真係會沖淡一切,終有一日你都會搵到屬於你嘅幸福,共勉之。

image : dailymail
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *