佬之香味

佬之香味

雖然我好欣賞會搽香水(不一定係cologne,下文詳解)嘅男士,而我又好熟悉男士香水嘅香味成份,離不開廣藿香(Patchouli)、荳蔻(Cardamom)、琥珀(Amber)、麂皮(Suede)、雲呢拿(Vanilla)及木質等比較grounding及厚實嘅一類味道,但喺而家呢個平均溫度仍然接近攝氏30度嘅悶熱潮濕天氣,我喺戶外空曠地方同你隔開咗整整兩個身位,都仍然聞到你身上嘅濃烈香味,令人只想遠離你多幾個身位,你覺得咁樣真係好咩?

我不禁打量一下呢位男士嘅衣著外貌:髮型整潔,裇衫西褲good fit,手錶皮鞋低調但講究,點睇都係個有品味有要求嘅男士,偏偏一身香味出咗事,實在令人扼腕。其實佢嘅香水並唔算難聞,只係用錯季節。

如前提到,男士香水一般味道比較厚實,但香港天氣就長期濕熱,上面提過嘅呢堆香味就未免過濃,唔係好適合喺悶熱日子使用。男士們如果想喺夏天smell good,不妨選擇一啲以柑橘(Citrus)類香味為top note嘅香水,常見成份有佛手柑(Bergamot)、西柚(Grapefruit)等,通常一噴就會好refreshing,但咁都未夠,由佢喺皮膚上停留一陣,聞吓佢沉澱後嘅middle同base note,會唔會過濃。如果聞到類似青草或淡淡木香味,甚至帶少少甜美嘅花香味,咁呢款香水就過關,可以喺夏天用。相反,如果你聞到類似雲呢拿嘅甜味,或皮革嘅陽剛味,咁呢款香水就留返秋冬先用啦。另外,而家好多香水都好興出海洋或海鹽嘅味道,都係夏天一個唔錯嘅選擇,不過最緊要都係試香水時停一停,聞多聞,因為top note好快會走,真正長時間留喺你身上嘅香味,要靠middle note同base note發揮作用。

其次係選擇香水嘅種類。Parfum/Eau de Parfum (EDP) 嘅香味濃度最高,可以last足一日,喺選擇時就要特別留意呢類香水嘅香味組合同你嘅使用需要。如果只係想refresh一下,又怕味道太濃烈嘅話,可以揀香味濃度次一級(價錢都會平少少)嘅Eau de Toilette (EDT) ,或最淡嘅Eau de Cologne。Cologne一般被認為係男士香水嘅統稱,但其實按正統細分嘅話,Eau de Cologne只係香味濃度最淡嘅一個分類名稱,所以選擇時都要留意返每個品牌對於分類及名稱嘅定義。好似Jo Malone咁,一概叫自己嘅香水為cologne,或者就解釋到點解JM嘅香水香味一般last得唔耐,但亦有可能只係品牌喜歡用呢個term,未必係一個分類,所以有心細選嘅話真係要問清楚。

最後利申一下我之所以咁熟男士香水,係因為我本身好鍾意用男士香水,廣藿香、雲呢拿同木質香味更加係我嘅至愛,所以好畀心機研究。講到尾,信貼士不如信自己個鼻,按自己嘅性格、氣質配合自己鍾意嘅香味,就好似成長一樣,都需要時間去摸索。Small good係好,但smell right,就係另一個層次。

香水分類參考:https://www.nytimes.com/…/differences-perfume-cologne-fragr…

啱睇就Like埋我地個Facebook專頁
曾經放棄夢想,又突然看到一線希望的寫字女生。

Leave a Comment

Your email address will not be published. Required fields are marked *