入坑,課金,棄Game

入坑,課金,棄Game

婚姻來自信任?

唔只,仲要包含住好多好多人性光明嘅元素,又要恆久忍耐又要有恩賜乜乜77咁。

所以好早我就覺得我地呢一代人類其實根本唔啱玩呢種婚姻遊戲,因為我地根本就無呢種質地去玩好呢種遊戲。

新時代嘅人,追求自我發展,生活與工作平衡,對戀愛係追求一種快樂嘅過程。所以婚姻呢種必然有痛苦嘅生活態度,就對呢種新思想進行一種強烈嘅衝激。

加上大家都被好多悲哀嘅文學作品所欺騙,對於兩性之間有種擺脫唔到固有觀念。

要明白呢種文學作品好多時係純粹表達作者嘅心情,未必係一種對自己生活客觀而有益嘅建議(詳情可以參考啲少女愛情語錄)

各種加強自我嘅因素存在係生活中,婚姻呢種令人咁有期待嘅遊戲,往往落差就會大得好驚人。

無他嘅,遊戲發展商日日出trailer講到點好點正,包你玩完返唔到轉頭。

就連你老豆老母都話:「呀囝,你唔係唔課丫嘛?」

「唔係喎,我早排先見幾個朋友棄game,好似……」

「人地唔識玩姐!」

「但係……」

「衰仔!養到你咁大個就係想你落坑!點數卡都買哂你依家先至想話唔玩!?」

言然,呢對父母可能早幾十年都係已經棄咗GAME。

「你要有婚姻,首先你要放得低個自我。」

呢句嘢係我聽過最無說服力嘅句子。

因為呢句嘢係由成日吊兒郎當嘅朋友 - 富爸爸所講。

當然對佢嘅評價由朋友黎作準並唔客觀。事實佢係一個努力工作又肯專心照顧家庭嘅男人。聽落呢種人應該配擁有一個完美婚姻生活,可惜事實偏偏唔係咁。

「你嘅隊友點對你,有時唔係自己可以話事。」

懷疑出軌,你又無證據,又可以點?

一:每日好似怨婦咁,大吵大鬧,玩跟蹤玩追查。

二:比以前更努力去做好自己,當逃避悲哀或麻醉自己又好,效益絕對會係好事。
或者到你有錢有面個陣,你根本已經唔會在乎,或者。

咁個自我呢?

「自我,有時就係傷害自己嘅來源。」

自我越大,越會諗點解決對方要咁做,越會覺得唔抵。因為覺得自己唔應該被人咁對待。

放低咗,你就覺得自己渺小,渺小到應該要去壯大自己。

逆境個陣,你覺得難受,仲係到不斷咁問自己點解會搞成咁,來自於你覺得自己一直好掂好掂,唔應該被人咁對待。

呢種咁逆線操作嘅思考,真係令人有啲……苦笑不得。

「你諗下,你玩隻GAME玩5年,就算再低機率嘅卡你都抽到一部份掛?你點都會羸過一部份人掛!?但你棄GAME 你就一定輸!」

我繼續用個唔知講乜嘅表情,去望呢件咁正能量嘅肥佬打機。

可能啲無乜自我嘅人又肯堅持玩落去嘅人,先會有得羸。

但我覺得重點係,呢個遊戲從來都唔係一個完美好玩嘅遊戲,總會有失落同傷心,只係啲天真嘅人覺得一定包開心咁解。

開唔開心,其實應該取決於自己。 

啱睇就Like埋我地個Facebook專頁
港豬廢青一名 只想吃喝玩樂不勞而獲 不求踏實地但求公屋有期

Leave a Comment

Your email address will not be published. Required fields are marked *