入過私院,就知醫保有幾重要

入過私院,就知醫保有幾重要

話說小妹年初開始胃痛,當時係公司最忙嘅時候,啲嘢永遠都做唔完,加上腦細放工後同放假都會搵我,壓力真係好大,所以當時覺得有胃痛都唔出奇就無理到。後來隔咗一段時間仍然會斷斷續續咁痛,於是我就開始去睇西醫、中醫,到咗最近差唔多每日都會痛,就算睇埋專科,食咗成個月藥都唔好,唯有局住去照胃鏡。

專科醫生話有幾種照胃鏡嘅方式,有一種係可以喺診所做,半清醒狀態照,會噴麻醉藥喺喉嚨,當支管到喉嚨位就吞佢落去,呢種價錢平啲,另一種要喺醫院做,麻醉師會做監測麻醉,全程會瞓著咗,瞓醒就做完,我咁細膽梗係揀後者啦。循例醫生都會同我講返有咩風險,即係有機會細菌感染、刺穿個胃或食道,甚至死亡,當然個百份比係好細啦,但係對於我呢啲咁怕死嘅人,聽到都真係有少少淆底。

上網睇話公立醫院通常係清醒照(除非係小朋友),有機會作嘔,亦都易嗆到,好辛苦,而且唔知要排幾耐,好彩屋企人有幫我買保險,所以去咗私家醫院。私院環境當然好好多,服務都係,有個小插曲係姑娘幫我插咗針,有個大陸阿嬸著住便服,拎住個手機過嚟睇我,講嘢有少少唔正,佢話佢就係一陣幫我嘅麻醉科醫生,真係令我驚上加驚,好彩最後都好順利,抽咗啲組織去化驗同埋切咗啲瘜肉,不過埋單差唔多成兩萬,如果無買保險我真係會即時暈低。

醫療費用只會愈來愈貴,普通做個胃鏡檢查都咁貴,何況真係有大病?無錢只可以去公立醫院,公立醫院缺乏人手,朋友話入到去真係無尊嚴,姑娘忙到唔得閒理你,只會對你呼呼喝喝,做完腳嘅手術都夠膽死叫你自己過床,加上醫療事故又愈來愈多,其實真係無乜信心,如果靠政府去改善醫療制度更加係等死,唯一可以做嘅係幫自己買份保險有個保障。

「你唔係不嬲對保險好反感嘅咩?」我說。
「係㗎,我覺得保險公司淨係想賺錢但又要扮到真心想幫人好假,但係既然遊戲規則係咁我都要跟啦,touch wood有咩事你同我屋企人都有個保障。」男友Mike說。
「嗯,我最近都諗住加多份儲蓄危疾,當儲埋錢。」我說。
「我哋又多一項花費,你努力賺錢之餘都要睇住個胃呀,身體健康永遠係最重要。」Mike說。

image : litenews
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *