做男人慘過食屎

做男人慘過食屎

讀者PM我:「做男人真係好大壓力,打成世工都無可能儲到首期,條女又日日催住哂,已經29歲驚有排都嫁唔出。唉,係香港做男人真係慘過食屎。點解做男人咁慘?」

做男人,慘又唔係話好慘,但香港十個男人九個賤係真,唔係鹹濕下流個隻賤喎,係卑微低賤,比人當地底泥嗰隻賤。

係香港地,錢係萬能。無經濟能力嘅男人,怕女人陪佢捱就唔敢害人;有經濟能力嘅男人,預咗要照顧埋女人。相反,有能力嘅女人梗係想搵返個同自己差唔多嘅對象,而搵得錢少嘅女人好自然靠男人 。全港地位最低下嘅一定係無錢嘅男人。

啲女人同你食第一餐飯就問長問短,查家宅咁問你有無車有無樓,人工幾多住邊區。你覺得佢市儈?你無上進心(能力)佢就無安全感。佢唔係貪錢,至少佢唔會認貪,佢會話佢只係想保障自己,想第日個BB有個好爸爸咋嘛。如果你乜都無,Sorry,你無資格同佢食第二餐飯。

咁女人用咩嚟交換?女人青春好值錢,同你一齊已經益咗你。而且佢嘅青春係佢嘅一切,趁後生梗係好好把握機會。當然,佢隨時揀過個更成功更成熟(即更有錢)嘅都係理所當然。你鬧佢忘恩負義?喂!老咗仲邊有Market啊?何況人越大就越知自己想要乜,一到適婚年齡就緊張──你無首期啊?唔係要我女仔出一半啊嘛?

但係男人變好、變有錢飛咗條女,就係唔負責任無膊頭、浪費女人時間、毀佢青春,係名符其實嘅無心肝賤男。

情侶交往時,男人出街比哂錢是常識吧?AA制?仲細咩?唔好玩啦!至於情到濃時上床就大家開心,事後唔滿意就#metoo 告你性侵。真假邊個知?唔洗講證據,佢嘅感受就係證據。放你上網單單打打,未判先審,你有做就咎由自取,無做又唔主動貼大字報都係你問題。

所以,我不嬲都覺得係香港地做男人好難,地位低賤得可憐。掉返轉講,身為女人,我唔覺得自己生活特別容易,可能因為我無當自己身體部位係八達通啦,不過咁講,邊個係香港生活得容易?但我好同情男人,因為呢個社會唔容許你地懦弱,於是我時刻都鼓勵女人獨立啲強大啲,經濟上同精神上為自己負責任,裡裡外外都擺脫弱勢嘅標籤,還返男人都可享受嘅權利出嚟,學會分擔男人嘅義務。

Photo: www.mantherapy.org

啱睇就Like埋我地個Facebook專頁
香港作者,崇尚自由 | 以文字演繹忠誠愛慕,以勇氣堅持追隨幸福。 | 最新出版:《馴養之丘》、《女生情事宣言》 | Instagram: kwaisinling

Leave a Comment

Your email address will not be published. Required fields are marked *