如果我係男人,我一定會追你

如果我係男人,我一定會追你

我有個朋友叫阿靚,雖然個名有啲老土,但佢真人真係幾靚,白白淨、面尖尖、瘦得嚟又有身材,簡直係可以用索嚟形容。外表掂之餘佢性格都好唔錯,大情大性,個人無乜所謂,食乜玩乜都OK,好易相處,可以話係男仔頭性格,最好嘅係佢直腸直肚,唔會同你玩心計,你知啦好多女人都係口講一句心諗第二句,又或者永遠唔同男人坦白自己想點,成日要人估(我承認我有時都係咁),真係好鬼煩,所以有次我都忍唔住同佢講:「阿靚,如果我係男人,我一定會追你!」

直至佢最近自己一個同埋狗仔搬咗出嚟住,仲邀請咗我上佢屋企玩,我就對佢完全改觀。其實我一入屋已經聞到一浸臭味,唔係普通嘅狗味,係尿味,原來佢隻狗瀨咗尿,但係佢完全無諗住抹,因為佢喺床度打緊LOL爆緊粗鬧人。雖然大家都係女人,但係佢竟然淨係著件超低胸吊帶小背心同喱士底底嚟招呼我,老老實實我都有少少尷尬。

「喂,你唔好話我知有男人上嚟你都係咁著呀。」我說。
「加返條短褲囉!有乜所謂吖,大驚少怪!」阿靚說。
「蝕底晒比人呀!你又唔係唔知自己身材幾好㗎啦。」我說。
「撞鬼你,講嘢咁似我阿媽嘅!哈哈!」阿靚說。

其實我不嬲都知佢懶,平時都唔會點做家務,但係無諗過佢食完啲杯麵都亂咁放,廚房成堆碗碟未洗,最恐怖嘅係我去廁所嘅時候,見到成個廁所都係血,仲要沖廁都沖唔走,係血跡嚟,我估要搵嘢刷先刷得甩,我真係唔敢想像佢有幾耐無沖廁,浸血腥味真係好難頂,我嗱嗱臨去完廁所即刻仆返出廳,而佢喺我心目中嘅女神形象亦崩壞咗。

「喂,你可唔可以唔好咁污糟呀?廁都唔沖!」我說。
「慳水嘛!」阿靚說。
「你咁樣因住無人要呀下。」我說。
「唓,男人都係睇樣同身材嘅啫,我唔比佢哋知我係咁咪得囉!不知幾多人爭住追我。」阿靚說。
「如果我娶咗你返去先發現你呢一面我會喊出嚟,其實你咁樣算唔算感情騙案。」
「um…我會形容為願者上釣囉,哈哈!」阿靚說。
Photo: internet
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *