愈好人愈折墮

愈好人愈折墮

好人難做,喺職場上更加唔應該做,因為「好人有好報,惡人有惡報」只係喺無能為力嘅情況下自我安慰嘅說話,做好人永遠無好結果,我都奶過唔少次嘢。最簡單嘅就係因為做好人,唔識拒絕同事嘅請求,然後個個都會搵你幫手,乜都關你事,最慘嘅係幫過一次,個責任就落咗你度,你say no,人哋就會話:「下,不嬲都係你做㗎喎,我唔識㗎。」

呀May可以話係我做咗幾年嘢入面見過最賤嘅同事,平日明明好得閒,去廁所都去半個鐘,周圍搵人吹水,但係腦細一行過/同事有嘢問佢就會大大聲話自己好忙,西聲西面叫你唔好嘈住佢,或者乜都話唔識唔知,但係佢就成日搵人幫手,拆紙箱啦(話手痛),搬嘢啦(話腰痛),搵嘢啦,有幾次佢都問我N年前某個event嘅相我file喺邊,我話:「下,我嗰陣未入職喎」,佢話你平時搵開嘢可能見過呢,我梗係唔L理佢啦,但係每次最後腦細都會開聲叫我幫佢搵,Fine,鬼叫我無佢咁識擦鞋咩。

賤嘅唔止係同事,仲有agency,唔好以為做畀錢嗰個就係上家莊,我做客一樣要畀人串,因為佢係腦細嘅所謂「朋友」,你咁遲畀料砌唔切喎份稿,下次唔該早啲(你估我特登唔send畀你?);拍嘢要準備呢啲嘢,你識唔識㗎?(我識仲使請你?)問多兩句就話唔方便透露,驚我學識咗佢哋嘅嘢,後嚟我自己出去上堂自學,先發現原來佢哋係無料,乜都唔識所以亂嗡耍走我。

可笑嘅係,愈賤嘅人反而愈係教到你嘢,因為佢哋會逼你快速成長,由yes man變得識say no,由乜都唔識變樣樣都識少少,慎防畀人搵笨,終有一日我離開呢間公司,都會慶幸遇過呢啲西人,而且我知道佢哋嘅level只係好低,未來仲有更多大佬需要打。

辭職已經拖咗半年有多,除咗唔想跳出呢個唔comfort嘅comfort zone之外,就係因為無謂嘅「責任感」,年頭想辭職,但啱啱有同事走,阿姐攬咗好多嘢上身,如果我都走埋,佢好似好慘,不如等請到人先啦,好喇到請到人又話就嚟出花紅喎,出完花紅又話就嚟加人工,好喇連人工都加埋,又有同事早我一步辭職,阿姐又呻話好大壓力,再有人走真係頂唔順,我就發現其實根本無一個時刻係適合辭職,公司永遠都係咁忙,就算請到人都好,都未必做得長,其實公司無話無咗邊個唔得,何需睇得自己太重要?捱壞身子,無人會可憐你。

「我驚遞咗信之後腦細阿姐都會黑我面或者態度勁差。」我說。
「唔使驚,你預咗佢哋會咁,唔好下下理人點諗你啦,諗下自己仲好。」男友Mike說。
「咁又係,再唔休息下我個胃真係爛。」我說。

每個人心目中都有條底線,你嘅底線又係咩?我嘅底線係唔好影響健康。

 

Photo: www.xuehua.us

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *