拍拖愈耐,男人愈懶

拍拖愈耐,男人愈懶

仲記得曖昧期嘅時候,阿Mike會帶我周圍去食好西,法國餐廳、日本居酒屋、地道大排檔,次次新款,拍咗拖之後佢就話食咩都無所謂,你諗啦你熟啲,一齊咁耐有幾多次係佢搵餐廳同我去試?一隻手數得晒。我唔係期望次次都係佢搵,但係十次有一次都唔會好過份掛?我唔係無投訴過,但佢話唔識點搵邊度有好嘢食,你係咪玩嘢呀大佬,你唔好同我講你唔知咩叫Openrice、飲食男女、Tripadvisor、問朋友/同事!

啱啱一齊嘅時候,我生日佢會去揀禮物畀我,後來都有,不過係我自己一條友去揀,自己畀錢,再拎張單去claim佢錢,其實無意思㗎喎,講真我自己都有錢買啦,我想收禮物唔係貪你嗰幾百蚊,係想收你嗰份心意呀,不過算啦佢都唔知我鍾意咩,而且佢工作忙吖嘛,邊有時間花心思去揀禮物吖,如果我咁都投訴又畀人話我係港女㗎喇。

過往都係因為佢嘅朋友留意到一啲我可能會鍾意嘅嘢,叫佢買,我先有禮物收,連情人節有花收都係因為佢嘅女同事自己整咗啲花叫佢買,究竟我應該開心定無奈?其實平日佢都對我好好,只係浪漫、驚喜甚少會喺佢身上出現,所以我決定教佢氹下自己開心。

「呢個美少女戰士嘅袋好靚呀,我想要。」我說,並將個台灣網址send畀佢,平時我絕對唔會咁講。
「好靚喎,你買啦。」男友阿Mike說。
「我都send埋條link畀你你都唔幫我買,咁同我自己買其實無分別。」我說。
「唔好嬲啦,一係我買日本環球影城美戰對鞋畀你,不過喺邊度有得買㗎?」Mike說。
「我頂,你都知我鍾意嗰對鞋,你咪上網搵囉,實有人放㗎啦,我搵埋畀你格埋價我自己買咗啦!畫公仔畫出腸真係好無癮。」我說。

我唔知其他女人係咪咁,但係我就係好容易鑽牛角尖,當阿Mike做錯少少嘢就會將佢以前儲儲埋埋嘅衰嘢集合埋一齊,遲到呀、唔細心呀、講錯嘢呀等等,雖然全部都係小事,但一集合咗個威力就好大,平時錫我對我好嗰啲完全唔記得晒,好在情侶嗌交其實都無乜隔夜仇,瞓醒氹下好快又無事,佢仲話帶我去間新開嘅餐廳。

「我琴日同阿Mike鬧交,佢拍咗拖之後就好懶,完全唔花心思喺我身上。」我說。
「下?好正常啫,我男友都係啦,以前整燭光晚餐,而家有公仔麵食都算偷笑喇。」死黨阿花說。
「你唔會覺得咁樣好大反差嘅咩?」我說。
「都會㗎,不過愛情就係會慢慢變成感情,如果佢好識氹女仔你咪仲驚,一陣佢去氹第二個呀,都係老老實實好。」死黨阿花說。
「嘻嘻,咁又係。」我說。

 

Photo: 香港01

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *