每個女人都係一隻高音怪

每個女人都係一隻高音怪

話說最近我個電話壞咗,換過舊電都救唔返,我見都用咗三年幾,就諗住買過個新電話,行咗幾間電話舖,襟過下啲機,其實都心裡有數要買邊部,於是就周圍問下價,去到其中一間,有個男sales就話還掂佢都要跑數,可以用佢個quota賣畀我,即係價錢會優惠啲,平幾舊水,又有靚靚手機殼送,於是我就拎咗佢張卡片。

本身都諗住唔買新機住,始終都要成幾千銀,但係舊機嘅用電量有幾日都突然急跌得好快,局住要買,就同男友拿拿臨去返間電話舖。用自己嘅血汗錢買新手機嘅感覺真係好滿足,我忍唔住不停讚部機,「嘩!好靚呀!影相有景深㗎!」、「個殼藍色好靚呀!」sales哥哥好好人,仲送咗幾塊mon貼、戲飛同旅行插座畀我,之但係佢話個手機殼無咗,要睇下其他分店有無,盡量搵畀我,叫我留低電話。

「人哋平幾百蚊畀你啫,使咪即刻講嘢勁高音呀。」我哋行出電話舖後男友Mike不屑地說。
「下?有咩?咁而家要佢幫手嘛,佢搵唔到個套畀我咪死,同埋佢又送咗咁多嘢畀我哋。」我說。
「咁你而家同你公司個同事Eva有分別咩?高音怪!」Mike說。
「咁我都唔否認高音係女人其中一樣手段嚟,適當時就會加以利用,有時熟能生巧,用咗都唔知㗎哈哈。」我說。

自此之後,Mike就叫我做高音怪,話我好畀個電話人,以後淨係可以畀佢個電話。老老實實我真係無察覺到自己高音咗,我仲問咗個好傻仔嘅問題,就係男人會唔會喺適當時候就扮低音,扮磁性啲,佢一句「痴線!」就完咗我個話題。。。

P.S. 想知Eva係邊個可以睇返小妹嘅舊文《是咪做得sales都有個格?》

 

Photo: cn.nytimes.com

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *