連個仔讀邊間都唔知叫咩名

連個仔讀邊間都唔知叫咩名

話說臨開學見大B校服有啲緊,帶佢去買新。去校服鋪,一開口就係講清楚邊間學校,小朋友在場就等店員目測或者度身睇下著咩碼,小朋友唔在場就講清楚要咩碼,咁呢啲係常識啦。

同場有個老母帶住個神高神大嘅仔,已經度好曬身,但兩母子講來講去都講唔出學校名,咁叫職員執件咩畀佢好?你唔係以為求其執件恤衫西褲就開學呀?

個老母話:「響健忘邨嗰間呀!」校服鋪賣成一百幾十間中小學幼稚園校服,店員又唔係地膽,鬼知佢講邊間咩。

我搭訕問:「中學定小學嚟架?」因為目測判斷唔到個仔係讀小六定升中一。

好彩個老母都識答係中學,咁我話曬都係個熟路街坊,知道嗰條邨就係得一間中學,我話:「係咪吳紀德紀念中學呀?」個老母話:「係喇係喇,就係吳紀德喇!」

好彩嗰個唔係女,而且唔係讀聖菠蘿。女仔讀得而又叫聖菠蘿嘅中學有四間咁多,而且件件校服都唔同色,你講唔出係邊間都好難幫到你。之不過如果係考到入任何一間聖菠蘿嘅話,個老母都無可能唔記得個名,因為應該向人曬命時講過無數次……

雖然唔係band1名校,但係都精神啲,記下個仔嚟緊六年讀邊間好唔好?唔通人地問起個仔讀邊間就開Google map search條邨嚟搵間學校名咩。(霞姨~~~)

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *