遇到個關心自己嘅男上司,男友話:「超!扮細心!關佢鬼事!」

遇到個關心自己嘅男上司,男友話:「超!扮細心!關佢鬼事!」

自從公司洗完冷氣之後,個冷氣就好鬼凍,通常我都係著埋外套都頂唔順先會熄細個冷氣,因為熄細咗嘅話坐角落位嘅同事就會好焗,甚至要開風扇仔。如是者每日到某啲時候我就會開始著外套,然後腦細Rex行過佢就會去熄細個冷氣,起初我以為係因為佢都覺得凍,後嚟有日佢行過我個位,之後又去熄細咗個冷氣,再返嚟同我講你開到個冷氣咁勁梗係凍啦,然後就好型咁走咗。

Rex有時行過都會睇我做緊乜,雖則我係做marketing,但係有時都要研究啲小電器(工作範圍闊到呢),說明書上面每隻字我都識,但集埋一齊就唔知佢噏乜,佢見我苦惱緊就會問我做乜,幫我研究埋,人肉解釋,一講就明,真係慳返唔少時間。有時我要搬重嘢佢都會幫手,總之大小事都會幫忙,就算我無開聲,有次佢仲幫我開嘢食,呢下就真係有啲唔知點,搞到我手殘咁,好彩無畀人見到。

最近我身體唔舒服,佢介紹咗好多唔同嘅醫生畀我,中醫、西醫、自然療法等等,有個咁貼心嘅腦細,其實都算係小幸運,但係男友Mike當然唔係咁諗,佢會話:「超!扮細心!關佢鬼事!」當然我有同佢解釋腦細其實對個個都好好,又有一個拍咗好多年拖嘅女友,平時都好gentleman,唔會抽女同事水,叫佢唔使擔心,然後佢就會話:「男人最明男人諗乜,總之呢個世界上所有男人都係PK,要非常小心!」然後我就諗,如果我轉新工佢一定會好擔心。

喺香港打工,要遇到好腦細真係好難,男腦細同女腦細,暫時我覺得男嘅比較好(他雖然都有遇過衰),唔知關唔關異性相吸事,男腦細對女下屬嘅要求真係無咁高,唔會雞蛋裡挑骨頭,做錯事都好,鬧兩句就算,唔會咁記仇(對男下屬就句句粗口),亦唔會因為你嘅衣著、用咩手袋、香水而針對你,身為女人,係好明白女人真係好容易得罪,所以對女腦細講嘢要特別小心。

不過跟女腦細,學到嘅嘢又會唔同,女腦細連細微嘅位都會執得好緊,例如設計圖上嘅一粒星星要跟邊一個pantone, marketing budget點樣可以慳得一蚊得一蚊,務求令每件事都可以完美啲,與人溝通嘅技巧亦好好,你想像下日日玩宮心計喎,點會唔勁?

雖然我已經辭咗職,但係現階段都未諗下一份工會做啲咩,腦細同上司又會係咩style,不過回想起嚟都慶幸自己有遇過一啲好腦細。

P.S. 嚟緊會有多啲時間寫嘢,歡迎讀者inbox我分享下你嘅職場趣事/辛酸事/無聊事,或者係睇完我本書嘅讀後感,大家唔使驚,我係唔會食人嘅XD。

 

Photo: 旭茉JESSICA

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *