啱啱出嚟做嘢嗰陣…

啱啱出嚟做嘢嗰陣…

啱啱出嚟做嘢,咩都say yes,盡量都唔想得罪人,而家?應做先做,唔應做就唔做。

啱啱出嚟做嘢,腦細講黃色笑話會好尷尬,而家?無乜感覺,或者笑埋一份。

啱啱出嚟做嘢,覺得同事可以做朋友,而家?辭咗職你就知邊啲先係真正做到朋友。

啱啱出嚟做嘢,唔係好敢講嘢,而家?適當時要表達自己意見,但有啲位又要保持沈默。

啱啱出嚟做嘢,對人無乜防備,而家?對你最好嗰啲反而要小心,通常都想搵你笨。

啱啱出嚟做嘢,會好守規矩,唔敢遲到,而家?遲到少少唔使死嘅,我OT你都無補水畀我啦腦細。

其實小妹都只係做咗五、六年嘢,而家仍然係一個小薯仔,無話有啲咩好勁嘅title,好高嘅人工,總之養得起自己,交到家用,生活過得OK,啦。最近量地令我多咗時間去諗嘢、去回顧,諗返起我人生嘅第一份暑期工,就係去百貨公司做sales賣男裝,做咗幾個月,學識點樣同人吹水,講嘢圓滑啲,唔好咁怕醜,對住啲肥佬、大叔都可以讚到佢天上有地下無,最印象深刻係有次返緊工去殘廁畀人用$1開咗我度門(好彩嗰陣已經洗緊手),個男人講咗句:「哎呀唔好意思,我以為入面無人。」我嗰一秒嚇到唔識畀反應,第二秒先醒起度門鎖咗梗係有人啦!

第二份暑期工係美容學徒,其實本身係諗住做接待,無啦啦又畀人呃咗做學徒,要幫人洗面、按肩頸、植眼捷毛、做減肥機,有日仲比人捉咗做試範,話我黑眼圈深,要影張治療前後相做廣告,嗰陣仲未識say no,最印象深刻係幫個客用辣椒膏做減肥機嘅時候唔記得戴手套,做完之後對手「慶」足成日。其實有啲美容院真係可以好求其,竟然夠膽死搵個啱啱返工乜都唔識嘅人去幫人做療程。

去完working holiday返嚟終於正正經經搵返份office工,做過PR、copy writer、marketing,當中總會遇過一啲西客:一個layout改你十九幾萬次,做客同designer之間嘅夾心餅絕對唔好受;又有遇過變態腦細:每日都鬧你,做乜都係錯,總之就係睇你唔順眼;小氣上司:佢唔收工你都無得收工,專喺臨放工先畀嘢你做,放咗工仲要24小時whatsapp你;仲有一啲衰到無人有嘅PK同事:有鑊你揹,有功佢領,笑裡藏刀,時不時都向腦細篤你背脊。

不過我亦好慶幸遇過一啲好叻好charm嘅腦細、好肯教人嘢嘅上司同一啲真係交到心嘅同事,有個仲變咗做男朋友。其實做過嘅每一份工,遇過嘅每一個人,都會令你有一定程度嘅成長,凡事都有兩面,呢一刻可能你好憎呢個A字膊嘅同事,乜都推晒畀你做,但係第時諗返可能就係因為佢令你學識 say no,唔再做 yes man。

image : the intern
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *