我愛妳!170

我愛妳!170

最近學人寫文章,開始對身邊嘅事敏感咗,唔再係閉關練功,拒絕接收外界嘅細節。因為寫故嘅我,好容易受外界環境影響,投入唔到自己個故事世界,咁就寫唔到落去。文章就唔同,由其是我寫嘅係速食快餐文,睇完無養份,無得增價之餘唔洗讀者入腦,個頭講完個頭散,同我寫嘅心情一樣。

不過雖然係咁講,但為咗想有返啲話題,寫之前都會不斷留意身邊所發生緊嘅事,特別係我寫日常無主題嘅文章。

就好似今次呢篇咁,我本來想無無聊聊講下今日係「大快餐」買咗杯檸水,(之前有人留言叫我飲,我就即刻去試,幾聽話!),不過就係唔知點解,個杯底個到有係奶茶漬……係外賣紙杯喎!

就係一單咁嘅事,我想將佢吹大啲咁去講。但無意中,我一路諗點寫時,係我面前行過咗唔少高度大概170以上嘅女仔,我忽然諗起一件事。

喺唔係好耐之前,我成日都企喺街到睇女仔(宜家更係少喇,俾人當怪叔叔拉Q我喇!),當時嘅我成日都係到睇,係俾較少會見到同自己差唔多高嘅女仔,而且仲要係靚嘅添。宜家我忽然由舊時嗰個時空飛返嚟現代,點解周街嘅女仔都又高又索?佢哋食咩大架?類雌激素過多?咁好難搵男朋友架喎!

因為以前少見,所以我養成一個留意高妹嘅習慣(170對我嚟講已經係高架喇),其實佢哋真係幾無奈……150都話自己出本書,搵下共鳴賺錢賺到結埋婚都有得繼續寫,我都幾鍾意睇呢個系列。但高妹……仲要係由細開始高到大個啲,係同輩到真係幾大壓力,同啲上圍發育身材好嗁女仔一樣,明明係優良品種,但係會被同年嘅人敵視你架喎。仲記得識親嘅高妹,十個有九個都有少少「寒背」,因為如果佢哋企到直一直,就俾人一種睇人唔起嘅斜視目光,但大家知佢唔想,不過第一印象就係唔太好,咁唯有縮縮下咁。

又有一啲情況,高大嘅女仔都會被人當係男仔咁洗,但佢身體構造其實都係個女仔嚟即,唔代表佢可以擔擔抬抬,特別係喺三姑六婆嘅女性圈子中,十次有九次都係推啲高妹出嚟搬枱搬櫈。明明個個都差唔多體能,手握力得廿幾,大家就當正佢係50,一個人可以KO成個場咁。唔知會唔會因為咁,啲高妹做做下,個人會矮返,所以以前唔覺有咁多高妹……(講笑即,我夠知無可能)。

不過宜家呢個勢代好唔同,我覺得呢一代嘅男仔真係好慘……點溝呀?知慧、家底、學歷,就連每月出糧都高過自己成層樓咁多,好自卑架喎。特別係如果個條女好nice咁同你講:

「其實我唔介意,你愛我咪我囉。」

我覺得呢句嘢真係對住個男仔嘅眉心一嘢中落去咁!初時堅係暈晒,到個男仔清醒返之段,佢先發現自己已經輸個場拳賽,你呢世都無得返轉頭,永遠要聽佢話。佢咁就得你,你點飛佢呀?(如適用)

 

Photo: Holimate

啱睇就Like埋我地個Facebook專頁
這個麻,是一個名為「十三郎寫作團隊」的組織,主要是各種靈魂的混合體,他們有各式各樣的創作,但都以文字為主,所以又稱為「多媒體廢作人」。

Leave a Comment

Your email address will not be published. Required fields are marked *