單程証新移民 v.s. 醫療資源的泥漿摔角

單程証新移民 v.s. 醫療資源的泥漿摔角

觀乎近日網上關於單程証新移民v.s. 醫療資源嘅論戰,看似沸沸揚揚,實質泥漿摔角,原因不外乎左翼同本土派嘅中心論點根本牛頭不搭馬嘴。

本土派中心論點:唔夠醫療資源服務新客->唔收或減少新移民
左翼中心論點:新移民佔用嘅醫療資源唔多;新移民係勞動力,對香港經濟有貢獻

兩個議題都唔同,根本冇筆戰嘅空間。但我建議,左翼要宣揚呢個議題,千祈唔好提新移民嘅經濟貢獻。因為就算你計到新移民創造嘅財富扣除公屋、醫療等福利後,依然令香港GDP淨賺,對家都可以一句收你皮:俾Working Visa,對GDP嘅效益唔係仲大咩?(簡單嚟講,即係我地對東南亞勞工嘅政策。)

更何況,左翼如果要打新移民嘅經濟貢獻,係會牽涉好多問題嘅。我舉幾個例子

1. 有左翼流派反全球化嘅其中一個原因就係移民會令當地勞工失業、或壓低勞工工資。低技術新移民移入香港,似乎會造成同樣問題。

2. 香港對東南亞勞工嘅政策常被稱為現代奴役制。左翼點解釋我地以單程証輪入移民,令佢地嚟港捱劏房、捱公屋,只係為咗香港經濟做貢獻,唔係另一種現代奴役制?

3. 點解香港男人唔使證明自己養得起中國配偶,但要證明自己養得起烏克蘭配偶?係咪歧視烏克蘭囡囡?換個角度諗,「每個人都有選擇在何處家庭團聚的權利」,話唔定左翼都正在爭取烏克蘭免審查單證証,但呢個真係⋯⋯全球唯一喇。

4. 數據顯示單證証移民入裹女多於男。當然啦,「每個人結婚嘅原因都唔同,唔一定係愛情」,但係攞稅金資助現代子宮販賣,又會唔會令女權份子不悅呢?(我承認呢度我邏輯上有所跳躍,唔為愛情嘅婚姻唔一定係人口販賣,但總之大家明喇。)

綜上,我建議左翼宣揚一家團聚嘅溫馨就好喇,唔好講經濟。講經濟貢獻,人地一句Working Visa就撻死你囉。

***

又話時話,一家團聚唔代表必然幸福。我做急症室時,見過一個Case。話得一個Case,就當然係超特極無限少數個別例子喇,大家千祈唔好以偏蓋全吖。一位四十幾歲嘅女士,帶住老公同一對仔女移居香港,同五十幾歲嘅哥哥一家團聚。兄妹骨肉分離幾年後終於重逢,個場面諗下都溫馨。好可惜,本身患抑鬱症嘅女士嚟港一段時間後,因唔適應香港高壓嘅工作環境而唔開心,唯有嚟急症室求醫。精神科醫生會診後診斷佢有Adjustment Disorder。呢位女士令我不禁掬一把同情嘅淚水:人生地不熟,原生地戶藉遭吊銷,無哂後路,仲要心靈受創,點返工吖!都係返屋企靜養啦。

呢個故事比左翼嘅教訓係

1. 唔好講經濟貢獻,因為如果呢位女士攞Working Visa嘅話,佢會返原生地靜養而非留響香港受非人對待同埋

2. 家庭唔係人生嘅全部,好多單程証移民都人到中年,未必適應新環境。其實制度上創造一個缺口,對佢地未必有益。

***

最後多口講句,其實大家成年人喇,講咩「你上一代也是移民」真係好小學雞,簡直好似啲一講美國移民政策就話美國白人也是移民嘅人咁小學雞。政策就係要因時制宜,一個城市有好多移民,唔代表佢要持續接收大量移民。真係要講,大家都係非洲人啦,一齊回歸非洲,好嘛?

當然有人會話,「你上一代也是移民」嘅脈胳係叫人唔好標籤新移民。新移民有幾融入社會,係好主觀嘅感受,我就唔評論啦。

 

Photo: 橙新聞

啱睇就Like埋我地個Facebook專頁

Leave a Comment

Your email address will not be published. Required fields are marked *