英國係咪無啖好食?

英國係咪無啖好食?

呢個問題最多人問,亦係最難答。

講到出街食飯,坦白講我未到比得起錢去米豬蓮餐廳食,但當地朋友食過都係話:「Okay囉,唔錯嘅。」我自己同朋友出街食飯,通常人均消費係£25至30左右,但呢幾個月食過一堆餐廳,都係果句:「Okay囉,唔錯嘅。」倫敦其實無乜正到飛起嘅美食,簡單講就係無伏,但唔深刻。如果你問平靚正嘅有咩好推介,好多「遊客必去嘅抵食餐廳」,例如Flat Iron、Nando’s咁啦,我最多會話都幾好食,性價比高,但係咪會令人驚豔?絕對唔係。特別係呢度嘅Local餐廳,話英國人係地獄廚神,真的不止是一個傳說……有時候喺香港,你係真係可以用一個超平嘅價錢,食到驚為天人嘅食物。

咁如果你話你好鍾意自己煮飯喇喎,咁呢度就真係天堂啦。你去超市求其買塊肉都唔會差得去邊,生果同菜永遠都係咁Fresh咁好食,魚又係好肥美,是但煎都油香四溢,廢廢地都要講一句:「真係肉有肉味,菜有菜味,魚有魚味啊!」你唔好笑啊,香港買肉真係可以無肉味!

唔知係咪英國太多人唔識煮飯,呢度嘅Ready Meal都幾痴線,完全唔係香港波仔嘅Level,真係會超乎你想象。中、西、日、韓、泰、日、印,你諗到嘅菜式都會有人出Ready Meal。食過最令我震驚嘅係……片皮鴨都有得叮啊!仲要都幾好食!最抵屌我覺得係超市賣嘅甜品,£2.5就有500g Tiramisu,絕對有東海堂咁嘅質素。所以身邊都有唔少唔會煮飯嘅朋友都係以Ready Meal度日。

啱睇就Like埋我地個Facebook專頁

Leave a Comment

Your email address will not be published. Required fields are marked *