唔好中計,政府只係明修棧道,暗渡陳倉

唔好中計,政府只係明修棧道,暗渡陳倉

2019年6月9號至今,所有曾經為反引渡條例付出過同埋表達反對嘅香港人,短時間成功令全世界嘅眼球集中係香港,終於稍為令林鄭縮一縮。雖然政府同建制派放晒風會遲緩修例,但係都同時講明唔會撤回,咁即係無回應過香港人嘅訴求。就好似一個想強姦你嘅人,因為有好多人出手阻止,然後佢話:「我都係唔強姦你住喇!等我遲啲準備好啲,再姦過!」,所以懇請大家唔好鬆懈,星期日都係要出嚟表態,都係要繼續保持作戰狀態,繼續互相合作,唔好互相指責,我地再無內耗嘅本錢!

請大家唔好天真地以為建制派會真心想叫停修例,佢地會咁做係因為佢地有不少係立法會嘅議席仲係要靠香港人嘅選票,今次呢條例牽連甚廣,睇在份人工同埋選票份上,呢班人點都要係投過佢地票嘅香港人面前做啲嘢,扮下出過力阻止林鄭。可能你會話,條例如果可以通過,都一定係建制派班人投贊成票先得,咁佢地大可以投反對票,咁就可以阻止啦! 理論上係,但係如果咁做,就係公然反中央,結果會係點呢?佢地都比任何人都清楚背後嘅風險。仲未計呢班人係檯底下嘅私利呢?你估下呢班人嘅資產會唔會有影響?另一邊,如果佢地投贊成票,下一屆你估選民仲會唔會投佢地呢?政治就係咁複雜。

引渡條例有幾魔鬼,相信都唔洗多講。正正因為今次有比以往更多嘅香港人行出嚟,發動好多社會運動,例如遊行、抗爭、多元化嘅不合作運動、學界聯署、老師聯署,律師聯屠、美國白官聯署、等等,仲有商界嘅人都表態,例如高銀寧願唔要2500萬都唔買地。香港人係短時間內令全世界都睇住呢壇嘢,我相信更加有機會成為中美貿易戰談判條件之一。其實建制派同政府一樣心知肚明,今次香港人嘅反抗唔係小兒科都唔係玩泥沙,係擺明車馬要背水一戰,所以政府都出一招「明修棧道,暗渡陳倉」。

表面話要暫緩,要延長諮詢,暗地裡就叫教育局出信叫校長要處分有參與罷課嘅老師,警務署一哥縱前線濫權傷害市民,今日就連醫管局都落指示要記低因為衝突而受傷嘅市民資料…… 背後嘅狼子野心都昭然若揭!香港人,真係真係真係唔好低估呢個香港政府,佢地由頭到尾都無打算放過我地。都係果句,今次真係最後一戰,大家繼續令更多香港人覺醒!

 

Photo: Times Colonist

啱睇就Like埋我地個Facebook專頁
好多廢中廢老叫我哋做廢青,但佢哋唔明白,今時今日仲可以生活係香港嘅廢青,先係最堅毅不屈,最熱血無私。廢青唔係一種身份,係一種態度。

Leave a Comment

Your email address will not be published. Required fields are marked *