沒有一個警察是無辜的

沒有一個警察是無辜的

2019年7月21號嘅元朗恐襲同上環開槍都只係反映出一個事實 — 香港警察嚴重失職,愧對學堂畢業誓言!以下兩段片已經可以證明部份警察已經喪心病狂同埋縱容行兇!

有線新聞報導:警察在720日已知道元朗將會有人發動恐襲

https://streamable.com/f36l4?fbclid=IwAR1_szHgdRtA6EevcrLrsJKvrXtJA_96tMaLY-dSB1YvU-TkZfJXZG4r4W8

警察在上環天橋無出旗嘅情況下向市民開槍

https://www.facebook.com/FTVV612/videos/1592660894203688/

元朗區議員黃偉賢同麥業成早係7月20同21號中午已經通知警察極有可能有人係元朗發動襲擊,警察回覆係「都收到風」,話會安排部署,結果係點?結果就係警署落閘、市民報警被掛斷電話、報警超過2個鐘先有警察到場、話自己唔識睇錶、同白衣人拍膊頭稱兄道弟、同手持鐵通嘅人一齊行但話見唔到有人拎住武器等等,呢啲就係警察嘅所謂部署?

一個有3萬人員編制嘅警隊,每個月最少出緊香港人9億糧做人工嘅警察,發誓會保護香港市民嘅警察,你地當晚盡過啲咩職責?對唔對得住係元朗車箱上面俾人打嘅男女老幼?有無諗過佢地只係一班返緊屋企嘅普通市民?係新城市廣場就咁撚勇武?去到元朗就龜縮玩失蹤?呢啲算乜撚野警察?自己本份都未做好,憑乜撚要人尊重?如果你地嘅家人當晚就係西鐵車箱上面,你地點樣面對佢地呀?撫心自問啦唔該!

上環嘅防暴警察係天橋任意向市民開槍,趕走記者,根本就係濫用武力!每一個警察都係法律賦予權力可以使用武力嘅人,你地唔撚係三歲小朋友呀,你地都有腦有眼去分是非黑白架,指引話唔可以向頭部開槍,結果槍槍都係平射!要驅趕示威者無問題,但唔代表可以濫用武力囉,當武力過火就成為暴力!服從上司命令係需要,但會唔會可以靈活變通?係唔係棍棍打頭?係唔係槍槍射頭?到底你地係唔識警例定係根本無視警例?不論係哪一樣,你地都係濫權呀,係你地甘心情願俾高層擺你地上檯,係你地自己令到市民睇唔起你地!

好多人都會有個謬誤:「一邊話警察係黑警,一邊又話要警察保護,好矛盾姐!」,我想講唔該搞清楚,香港人交稅去請警察保護市民,佢失職就自然要出聲,市民都好願意俾機會警察去改善,但結果就強差人意喇!打個比喻,屋企個工人姐姐打鳩你個仔,你叫佢以後唔好再打,咁係咪工人姐姐話唔做其他家務,但每個月都要出糧就理所當然?都唔好話正唔正義感啦,打工都要做好本份啦,警隊每個月出緊最少9億糧呀,擁有全香港最強裝備嘅人呀,對你地要求高都好正常啦下話?!

講到呢到一定會有人講警察都有良心嘅,我個人好同意架,但係到目前為止都未見到有警察發聲話恥與濫權嘅同袍為伍喎,都無警察發聲支持要成立獨立委員會啵,無人講邊個知呀?最簡單啦,唔戴委任証,遮住編號都夠膽做得出,係學校做風紀都知,要捉人都要戴返個風紀章啦,做警察嘅都唔識?定係呢班所謂嘅警察都唔尊重自己係警察嘅身份,覺得自己羞家?點解我話沒有一個警察係無辜?因為沉默都係幫兇,咩都唔做係唔會有可能為警隊挽回聲譽,在此呼籲有良知嘅警察應該集結並且諗方法做啲實際工作去改變呢個風氣,否則只會好似癌症一樣,當有一日癌細胞完全吞噬好細胞,警隊將會徹底腐敗,完全毀滅!

不嫌其煩再講一次,請緊記我地嘅五大訴求,其中一樣就係追究黑警濫權同失職,元朗恐襲同上環開槍同在一列。

壁立千仞,無欲則剛。公道自在人心,是非不在時勢。香港人加油!

 

Photo: cn.nytimes.com

啱睇就Like埋我地個Facebook專頁
廢青一名,醉心填詞,欣賞林夕老師的細膩感情,喜愛方文山老師的詩情畫意。以字發聲,月旦春秋。不想在沉默中滅亡,深信堅持才有希望。

Leave a Comment

Your email address will not be published. Required fields are marked *