你而家打低我,我會只會變到你想像唔到咁勁

你而家打低我,我會只會變到你想像唔到咁勁

浸大學生會長喺鴨寮街買「激光筆」,被警察當係「激光鎗」,以「管有攻擊性武器」逮捕。究竟一支筆係唔係槍,暫時之間莫衷一是。

不過講到棒状既激光武器,又點能夠唔提起《星球大戰》裏面嘅激光劍(Lightsaber)?

激光劍,係絕地武士(Jedi)嘅代表信物 (黑勢力都有激光劍呢個係後話)。 同激光槍嘅分別,在於激光劍嘅能力取決於絕地武士嘅意志,唔係人人拎上手威力都一樣,而且激光劍嘅光束只有一條,只會斬殺瞄準嘅邪惡,唔會好似槍咁樣濫發,傷及無辜。絕地武士用嚟防守,佢就係防具;用嚟攻擊,就係攻擊性武器,所以係一種絕地武士認為符合正義嘅武器。

題目嗰一句對白(If you strike me down, I shall become more powerful than you can possibly imagine.),係第一套星球大戰《Star Wars Epidode IV, The Last Hope》, Obi Wan Kenobi 同自己邪惡嘅徒弟Darth Vader 對決嘅時候講出嚟嘅。Obi Wan Kenobi 講完一句對白之後就收起激光劍,等Darth Vader 一劍斬落去自己度,呢一刻奇妙嘅事情發生咗:Obi Wan Kenobi 消失於無形無蹤。系《星球大戰》之中, 佢以類似圓寂嘅方式,成為咗原力嘅一部分(The Force,宇宙萬物之力,同Police Force好唔同)。 正因為咁,佢成為咗Darth Vader 心裏面永遠打唔敗嘅敵人。

《星球大戰》嘅成功,係因為佢係一套以科幻去包裝去講武士道精神嘅戲。力量係無形,要用個心去感受,可以喺正亦可以喺邪,睇下用嘅人嘅心地係點樣。當邪惡嘅力量以為站在上風,可以打敗正義嘅時候,邪惡先至發現係冇辦法打敗正義嘅信念。

即使後來黑暗勢力得勢, 仍然無法阻止星際最強,年青嘅絕地武士Ren出現,Obi Wan Kenobi嘅弟子 Luke Skywalker嘅激光劍亦都薪火相傳咁留到去Ren嘅手上。一把激光劍,證明咗正義嘅信念係只會一代又一代咁承傳落去。

係黑暗嘅力量心中,激光筆都可以係激光槍。大家都要相信信念驅不散,香港人加油。

啱睇就Like埋我地個Facebook專頁
時間長河中的驚鴻一瞥

Leave a Comment

Your email address will not be published. Required fields are marked *