聲明:我地醫護一向對警察最客氣最有禮貌

聲明:我地醫護一向對警察最客氣最有禮貌

消息指有警員被醫院職員不禮貌對待,包括:

1. 在病牀旁看守時,被醫護無理呼喝

首先我地醫護一向對警察最禮貌既(唔準笑),我地份Medical Record上冇寫過我地有呼喝警員,更未能掌握足夠資料證明呼喝If any係有理定無理。希望警員明白,呼喝係主觀感受,同事可能只係對得撞聾老人家多,講嘢大聲係自然反應,絕無襲警意圖。我呼籲感到情緒受困擾既警員提供更多資料,以行之有效嘅既定機制投訴醫護,我地每個人執行職務時,都係有帶委任證既。

2. 醫護唔俾警員使用椅子,令警員要站立看守被捕者

我地份Medical Record上冇寫(下略),其次我希望警員明白唔少臨終病人家人陪佢走最後一程時,都係企響度。可能當時同事見到有家人久站,自然反應下攞走你張椅子,當然更有可能既係我地同事見唔到有椅子既存在,我重申係見唔到到到。其實病房根本唔係用做擺放椅子既地方病房本身就唔夠位擺放椅子,都唔可以排除係洗地時褪下褪下張椅子褪走咗,或者跣落地下,更唔可以排除椅子係人扮既。

同時醫護理解久坐會造成靜脈栓塞,必要時會不惜用以手踢開椅子既方式守護警員健康

此外小妹不才,請問響香港法例或警察通例入面,邊一條指明警察要守響床邊?

3. 在急症室的醫護知道其中一名被捕者有傳染病,帶到隔離病房時未有通知警員有關情況,令該警員未能適時自我保護

我地份Medical Record上冇(下略),另外相信當時醫護響電光石火之間得知病人有傳染病,感到生命受威脅,選擇先行上Gear,以便能無後顧之憂地執行職務,方未能及時通知警員有關情況;相信點遲都未至於遲四十分鐘,最多三十九分鐘啫,延誤並不長久。醫生都係人,都要保障自己生命,希望警員諒解。亦有可能醫護人員事前已做出涵蓋式通知,但係警察因角度問題睇唔到。醫生當時亦睇唔到吸入含病菌空氣嘅警員在身體上有任何問題。呢個做法唔完美,可接受,下次醫護會響適當時機以適當方式知會警員(例如用Whatsapp),以免雷同投訴流出市面。

此外小妹不才,講到隔離病房我當佢Airborne啦,莫非係Smear Positive TB?唔通去到空氣傳染病嘅負壓隔離病房,警員都要坐響床邊咁唔人道?其實所有羈留病房,吖唔好意思,係隔離病房門口都會掛住中英雙語嘅牌,列明病房內面有冇閉路電視,同理進房前需唔需要上Gear、戴口罩、笠頭套。請各位警員切且礙於經驗,以一般認知推斷自己可以隻身闖入房內,務必認清牌上嘅字,方可無後顧之憂地執行職務。

啱睇就Like埋我地個Facebook專頁

Leave a Comment

Your email address will not be published. Required fields are marked *